إزاي أحب نفسي؟
السؤال اللي بنسأله لنفسنا كتير:
"هو إزاي أحب نفسي؟"
والإجابة بدأت تظهرلي لما فهمت إن الحب الحقيقي مش بييجي من غير معرفة.
يعني… هو ينفع تحب حد من غير ما تعرفه كويس؟ من غير ما تشوف هو بيحب إيه، أولوياته إيه، إيه اللي بيفرحه وإيه اللي بيتعبه؟
أنا بدأت أحب نفسي أكتر لما قعدت معاها بصدق… لما سألتها بتحب إيه، بترتاح فين، إيه المواقف اللي بتقويها وإيه اللي بيوجعها.
ومن هنا لقيت إن في جوه كل واحد فينا مصفوفة قيم هي اللي بتحكم اختياراته في الحياة.
لما عملت تمرين ترتيب القيم اكتشفت إن قيمة "العزلة" عندي عالية جدًا… يمكن لأن العزلة كانت بتحميني فترة طويلة. لكن في لحظة صدق مع نفسي قررت أستبدلها بقيمة "المشاركة". وهنا كأني استقبلت إرشاد إلهي بيقوللي:
"حان الوقت تتواصلي مع الناس بشكل مباشر، وتشاركي معاهم اللي اتعلمتيه."
ومن هنا بدأت أعيش تجربة مختلفة تمامًا… من تقديم برنامج "ساعد نفسك" لايف على إنستجرام (واللي حلقاته كلها موجودة على اليوتيوب)،
https://youtube.com/playlist?list=PLjys5mkKLY6xZ93lVQSnbMNV0HcBGcGMF&si=Q5wxlnzZgxRBCh_j
لحد سلسلة البثوث مع ضيوف مختلفين.
وكل مرة كنت باكتشف بعد جديد جوايا… وبعد جديد في الآخرين.
والأجمل من كده… إني لما كنت بقدّم الدورات مش بس كنت بقدّمها للمتلقي، ده كمان كنت بقدّمها لنفسي. رغم إني طبقت مراحلها قبل ما أبقى معالجة ولايف كوتش، لكن لما شاركتها مع الناس كنت بحس إننا في نفس الفصل: أنا "المعلّم" وفي نفس الوقت "التلميذ". التجربة دي وسّعتني، قرّبتني من نفسي أكتر، وخلّتني أشوفها بعيون جديدة.
طيب إزاي نحب نفسنا عمليًا؟
اتعرف عليها: خليك فضولي تجاه نفسك زي ما بتبقى فضولي تجاه اللي بتحبهم.
اقبلها: بحلوها وبعيوبها. القبول هو بداية أي حب حقيقي.
اسمعها: اسمع مشاعرك واحتياجاتك بدل ما تكتمها.
شوف قيمك: لأن القيم هي البوصلة اللي بتمشيك في الحياة.
شاركها مع العالم: لأن المشاركة مش بتفيد غيرك بس… دي كمان بتغنيك أنت.
وكل مرة هتحب نفسك فيها أكتر… هتندهش من جوانب جديدة هتظهر جواك.
✨ استنوني أنا هبه سعيد و طارق البرجاوي في بث مباشر بعنوان:
"إزاي أحب نفسي؟"
الأحد 17 أغسطس، الساعة 9:30 مساءً بتوقيت مصر، على إنستجرام.
https://www.instagram.com/heba_saied7?utm_source=qr&igsh=MWdsNnI5aXltYnh6MQ==
